日本北九州半自駕遊
2015年12月4日 (Day 6)熊本→長崎
熊本、島原、長崎
今日天氣好好呀，離開酒店，去食個早餐先，依個位於JR站旁邊的西式快餐店，係食西式早餐既，麵包新鮮，D咖啡都唔錯架，係阿嘟最鐘意飲既味道。價錢(450円/1人)。
食完早餐，向「長崎」進發，尋晚我地已經還左車喇，所以今日喺熊本乘搭巴士喺熊本港下車-(480円/1人)轉船去「島原」再轉車去「長崎」。
去到熊本港，我地入去買船飛喇，船飛(1000円/1人)，船程一個小時，好短好快過，點解好快過，因為船上係有「特別節目-海鷗呃蝦條」，而各位想「被呃蝦條」既話，就可以喺碼頭道買定D卡樂B，雖然喺船上既甲板都有得買，但係會貴小小啦，船上既自助蝦條箱，每包100円，碼頭就50円，慳左可以喺船上買杯雪糕食呀，提提大家，海鷗呃蝦條依單野，只有冬季先有，夏天D海鷗可能去左避暑。
而碼頭都有手信店，係買熊本手信既最後機會，有買趁手喇喂﹗
買船飛資料：http://www.kumamotoferry.co.jp/
阿嘟叫我唔好「呃蝦條」，同埋我想講，阿嘟個頭真係好大，次次都要用隻大雞先遮得晒佢個頭。
我地買完晒野就去排隊等上船喇，欣賞下寧靜既碼頭都唔錯，自駕遊既朋友仔亦都可以「連人帶車」上船架，如果怕上船D位好窄，泊位技術唔太精湛，好似話可以叫服務員(代客泊車哥哥仔)幫幫手架，下圖就係車輛上另一架船既情況。
正所謂，「早起的蟲比鳥吃」，我地早排隊就早揀位，船有二層，我地上左上層，係一個一個「卡位」，好C服的，而「呃蝦條的海鷗」會喺上層既甲板出現，所以上層喺好有優勢既。除左餵海鷗之外，仲要餵肥嘟，佢要扭食雪糕，船上D雪糕又幾好食架喎。 ~^O^~
另外，吸煙人士如果怕一個鐘頭船程煙癮難頂，其實底層既甲板喺有吸煙區既，放心~~
隻手係阿嘟既，佢玩得不知幾咁開心，我D手指短到有D似蝦條，所以我怕佢地誤會左，我驚住咁玩左幾條，D海鷗好近好近，近到基本上可以捉到佢地，正之體驗。
落左船喇，我地去到依個叫「島原半島」既地方，環境好寧靜，無乜人，好舒服既，不過我地行程裡面無預到依個景點，而時間又比較緊張，食完午餐要走搭火車出發「長崎」喇。
喺火車站斜對面見到一間餐廳，就入去食喇。叫左2個定食，價錢係(2538円/2人)，雖然唔係書推介，但係有驚喜，個鐵板牛肉好JUICE，而果個天婦羅蝦新鮮厚肉，大滿足咁離開餐廳。其實我覺得喺日本食野真係唔會差得去邊，是旦求其一間餐廳都好味道。
就係坐依架火車去諫早(1510円/1人)，再轉火車去長崎(900円/1人)。
成功到達長崎火車站，我地今晚住山頂，無理由去酒店CHECK IN之後又落返黎架，我地寄左個行李喺火車站既LOCKER，之後就去四圍行喇。
長崎既海邊，都有幾間餐廳，坐喺道吹吹風，好悠閒。
長崎有好似喺香港既叮叮，依款叮叮都幾方便，可以買One Day Pass，價錢：(500円/1人)。
之後我地去「大浦天主教堂」，依條街附近有好多手信店，條街係斜既，建築物又好有特色，見到有小食「角煮」，話你知，黎到一次鐵定必定要食，角煮係一個包仔夾住一件有醬汁既五花腩，個包仔好鬆軟，夾住個五花腩一口咬落去，入口即溶，五花腩既香味喺口裡面化開，有升仙既感覺。HEHEHE~~ 300円一件，而我地食既時候都係喺店鋪前食埋先走，因為好似話日本人覺得，邊食邊行係影響到他人既行為，如果有人知道話我知丫，唔該!
好喇，我地去左中華街，我成日覺得日本人演釋「中華」依二個字係好漫畫，未到之前係好憧憬唔知會唔會走入左動漫既世界。
行完都入黑喇，我地又回到個海邊，食燒蠔、燒海鮮，當然唔少得酒。我地叫左一份燒蠔(10隻)，一份蒸蠔(10隻)，一份燒海鮮，二杯白酒，之後啤酒放題，總共9240円/2人。
燒蠔既時候大家就要小心D喇，唔好咁近個爐，因為D蠔會爆水，整到一面都係，整親隻眼就唔好喇!
阿嘟又飲醉酒，話要去濕平，當時應該係9點鐘左右，D商鋪都差不多關晒門，激安未收檔，唔好放過佢。
之後我地就返去火車站攞返個行李，搭的士去酒店(1210円)，我地住依間酒店係喺「稻佐山」，果期因為「稻佐山纜車」維修，所以無得睇夜景，阿嘟係一個好浪漫，超鐘意睇夜景既男人，所以佢話鐵定必定要睇，為左個夜景你可以去到幾盡。哈哈哈。
酒店：Inasayama Kanko Hotel（稻佐山觀光酒店)
價錢：18360円/1房1晚
而依間酒店係有2個溫泉既，其中一個展望風呂可以一面浸溫泉，一邊望住「稻佐山」既夜景，而另一個露天風呂就無乜特別，因為係「無」風景睇既。
＊－。－。－。－。－。－。－。－。－。－。－。－。－。－。－。－。－。－。－＊
╭。☆║．．．．．．．．．．．．．．║☆。╮
2015年北九州半自駕遊
╰。☆║．．．．．．．．．．．．．．║☆。╯
☆2015年11月29日 (DAY 1)☆
☆2015年11月30日(DAY 2)☆
☆2015年12月1日 (Day 3)☆
☆2015年12月2日 (Day 4)☆
☆2015年12月3日 (Day 5)☆
☆2015年12月4日 (Day 6)☆
☆2015年12月5日 (Day 7)☆
☆2015年12月6日(Day 8)☆
╭。☆．。☆．。☆．．．♬♬~(￣▽￣)~♬♬．．．☆。．☆。．☆。╮
╰。☆．。☆．。☆．．．．．．．．．．．．．．☆。．☆。．☆。╯
沒有留言:
張貼留言