日本北九州半自駕遊
2015年11月29日 (DAY 1)
香港→福岡
福岡、櫛田神社、博多運河城、屋台
我地搭果班機係由香港13:05出發，17:10到達福崗機場，攪晒出境手續大約18:00左右。而機場去市區只需要搭二個地鐵站。
到左中州，立即去左酒店Check In，今晚係住係中州既一間酒店-中洲公爵酒店。一晚既房價係HK$530。房間普通啦，勝在夠平丫麻，可以打開個喼既。
喺房間裡面休息左一陣，就急不及待咁出發喇，(6:15pm)第一站梗係去一蘭總店朝聖啦。一蘭分左2個區既，一個區係屋台區，而第二個區係拉麵區，因為我地諗住今晚食屋台做宵夜，所以我地喺拉麵區果道食既。入去坐之前，就要喺門口既拉麵售賣機買票，方可入座，係先付款後享受，同香港一蘭有D唔同既。每碗麵係790日圓。
入座之後，就會比一張拉麵要求既表格你，可以選擇自己對麵既軟硬程度、有肉無肉、多蒽少蒽、味道濃淡等等。
食完一蘭之後呢，我地步行過去「櫛田神社」，由行過去大約5分鐘啦。話晒黎到外地，就入廟拜下神，祈求旅程順利。當時已經晚上8點喇，神社都熄晒燈，直至晚上十點前都依然可以進入，熄左燈既神社别有一番風味架~~~~
拜完神，去「博多運河城」行一行，沿住中州屋台街行過去5分鐘左右。隨便可以睇下陣間喺邊間屋台食。
「博多運河城」裡面既水池係有定時既激光表現，撞啱睇下都無妨。
阿V話一定要係MUJI裡面買一塊鏡，喺香港無架! 所以又黎睇下咁…
行完街，睇完野，肚又開始餓喇。去我地最期待既屋台喇。YEAH~~~~~~ 有好多食唔同款式既屋台，當時大約晚上10點左右，每間屋台前先都有好多人排隊，可以在屋台既門外睇下佢大約幾多錢，同埋屋台個MENU係掛晒係「牆」上面，而且只有日文，所以只可以指指下咁叫食物喇~
不過實在太多人，所以我地無喺中洲屋台街道食，而諗住返酒店休息喇，點知發現酒店樓下有幾間屋台又唔洗等，就立即走入去試下啦!
依鑊野真係開心大發現，位置唔係旺區既屋台係無遊客既，只有本地既辦公室大叔同OL，佢地見到遊客好好客既，問我地喺邊樹黎仲同我地分享福崗好玩既地方。而價錢方面，我聽其他去中洲屋台既朋友講，點幾串串燒及飲一杯，大約每人需要HK$300，而我地每人食左成5串串燒，飲左8支大啤，同埋2杯燒酒，埋單6500日圓，每人只需要HK$110左右。抵到爛呀~~~ 其實屋台周圍都有，唔一定要去「名牌屋台街」，不過一定要夠膽，因為真係要用日文溝通，無其他語言SUPPORT架。 依鑊野都係好彩阿嘟夠薑咋~~!
食物味道好地道架, 簡簡單單已經好好味呀~~~
一坐低，落角頭有個日本大叔，叫阿嘟陪佢坐，一張二個人既櫈要坐成三個人，都真係幾迫架，(阿嘟：雞比全程只有半個PATPAT喺櫈上面)。但好有風味，期間依位大叔，同阿嘟傾左好多計，大家只能用簡單既英語交流，而店主本身連小小既英語都唔識既，都係靠依位大叔講解，佢地仲傾到攬頭攬頸添，最終仲交換埋佢地既FACEBOOK。
飲到差唔多喇，大叔話要趕尾班車回家餵老虎(他太太)喎。 ~^O^~ , 咁我地都走喇。飲飽食醉之後，就去24小時既「驚安之殿堂」濕平，點解叫驚安？因為會平到你驚喎。
阿嘟表示：上網聽人講話：驚安都唔算係最平，只要你識搵既話，沒有最低只有更低，但如果比我選擇都會去驚安，因為雖然只係平幾蚊，但係唔洗四周圍，慳左好多時間，可以去睇第二D野。
濕平完就回歸酒店訓覺喇~~~咁樣就過左愉快既一天喇~~~
╭。☆║．．．．．．．．．．．．．．║☆。╮
＊－。－。－。－。－。－。－。－。－。－。－。－。－。－。－。－。－。－。－＊
╭。☆║．．．．．．．．．．．．．．║☆。╮
2015年北九州半自駕遊
╰。☆║．．．．．．．．．．．．．．║☆。╯
☆2015年11月29日 (DAY 1)☆
☆2015年11月30日(DAY 2)☆
☆2015年12月1日 (Day 3)☆
☆2015年12月2日 (Day 4)☆
☆2015年12月3日 (Day 5)☆
☆2015年12月4日 (Day 6)☆
☆2015年12月5日 (Day 7)☆
☆2015年12月6日(Day 8)☆
╭。☆．。☆．。☆．．．♬♬~(￣▽￣)~♬♬．．．☆。．☆。．☆。╮
╰。☆．。☆．。☆．．．．．．．．．．．．．．☆。．☆。．☆。╯
沒有留言:
張貼留言