日本北九州半自駕遊
2015年11月30日(DAY 2)福岡
福岡、柳橋連合市場、藥院大通、舞鶴公園、福崗城跡、福崗塔、釣船茶屋
我地八點半左右出發，今日係福崗市內遊，買左地鐵一日周遊券620yen，喺任何地鐵站售票機都可以買到。
大家諗住去「柳橋連合市場」食早餐，去到原來好多食店都未開既，只得一間食店係九點十五分先開鋪，餓住個肚四圍行下。入到食店大家都係點一個招牌海鮮丼670yen。
好唔好食呢，我覺得正架，你唔好睇佢個樣唔華麗，食得出魚就十分新鮮，好鮮甜既。食完D商鋪都開左小小，可以買D土產做手信架。
下一個目的地係去「藥院大通」，依個地點係阿嘟話要去既，阿嘟話睇到D相覺得好靚，所以去行下，感受一下佢既優雅既風情。
條街好靜，無乜人，依條街有個別名叫「貴婦街」，我地行行先知道點解，因為依條街好多整容醫院，應該出好多「貴婦」，哈哈。依個原因係我地吹出黎既，「貴婦街」既真正由來係因為好多日本女士到依條街HIGH TEA，所以先咁叫佢姐。
街既盡頭係「福岡動植物公園」諗住黎到就入去睇下啦! 點知我地睇到佢平時睇唔到既野，就係依個牌。
我地搭巴士去左「天神」行GU，收穫都幾豐富。
之後就食Lunch喇。我地食左蛋包飯(每人916yen)，份量就得好少，味道同香港差不多，阿嘟同我都覺得幾好食，唔知係唔係我肚餓呢。而依個蛋包飯就好茄味既，所以對於唔鐘意食茄既朋友仔，對於鐘意食茄既朋友仔黎講係好正架。
去「舞鶴公園」，睇「福崗城跡」，名乎其實既城跡，即係遺跡，對歷史有興趣既朋友仔黎講應該係幾開心。我地去到既時候，仲有小小紅葉黃葉睇，hea下都唔錯丫。
hea完，行完公園，差唔多黃昏，我地搭地鐵去「福岡塔」「Fukuoka Tower」，上觀景台費用需要640yen。
睇完咁靚既夜景，要去食晚餐喇，人在外地就算什麼原因都好，要相信Google之神，乜野係Google之神? 咪就係Google Map囉，因為我地落到樓下搵唔到車去餐廳(慘)，好彩有神帶領我地去搭152號巴士，由福崗塔去天神區。
到左我最期等既「釣船茶屋」，喺未出發既時候，我同阿嘟講：「鐵定、必定、一定」要去依間餐廳，因為佢有得釣魚架，釣完魚可以立即刺身佢，好興奮呀!
依個係釣船茶屋既入口
餐廳內部係二架大船，船旁邊有幾個魚池，我地就係釣紅鯛(即係香港叫立魚)喇。
魚竿免費，魚餌(櫻花蝦二隻)100yen，釣到條魚刺身就2750yen，另外魚頭我地用汁燒加150yen。
阿嘟放左一陣就有魚上釣，但最後失敗左，條魚飛返落「大海」，各人都釣左一陣，最後阿V成功釣到，我地先至有魚食。
其實唔算太難釣，係要同朋友合作架，因為魚竿好幼，唔夠力拉條魚上黎，要有第二個人用網撈起條魚先得，見到其他食客經常釣到，好開心架。喺釣緊魚既途中，梗係叫d野食住先，如果唔係都唔知幾時有野食，當然唔少得飲酒啦。埋單13,064yen(4人價錢)。
講下題話先，釣船茶屋出面有一間自助串燒既餐廳，都幾特式既。如果我地唔係一早有計劃，就會去試下喇。
又係飲飽食醉既時候，阿V同R唔夠皮，要再大戰「驚安之殿堂」。我地就返酒店休息喇，因為聽日開始要渣車喇。
＊－。－。－。－。－。－。－。－。－。－。－。－。－。－。－。－。－。－。－＊
╭。☆║．．．．．．．．．．．．．．║☆。╮
2015年北九州半自駕遊
╰。☆║．．．．．．．．．．．．．．║☆。╯
☆2015年11月29日 (DAY 1)☆
☆2015年11月30日(DAY 2)☆
☆2015年12月1日 (Day 3)☆
☆2015年12月2日 (Day 4)☆
☆2015年12月3日 (Day 5)☆
☆2015年12月4日 (Day 6)☆
☆2015年12月5日 (Day 7)☆
☆2015年12月6日(Day 8)☆
╭。☆．。☆．。☆．．．♬♬~(￣▽￣)~♬♬．．．☆。．☆。．☆。╮
╰。☆．。☆．。☆．．．．．．．．．．．．．．☆。．☆。．☆。╯
沒有留言:
張貼留言