日本北九州半自駕遊
2015年12月2日 (Day 4)
大分縣
別府、九州自然動物園、八大地獄、湯布院
喺酒店食左早餐，CHECK OUT埋出發喇，我地第一站就係去「九州自然動物園」，資料：http://www.africansafari.co.jp/chinese/，我地9點去到，點知佢開9:30，所以我地去附近既一間食店，買左鑵咖啡對住依個大草原嘆下。
到9:30喇，我地係第一個客人，要渣架車到入口購買門票既，成人2500yen，小童1400yen，除左入場券之外，仲要買一乘車票，係搭下面果架動物車，總共一個人要3600yen。講下點解要買張乘車票先，依架動物車會載我地入去餵動物，平時就見到d動物喺個籠裡面，今次輪到我地困左喺個籠裡面喇。
我地出發喇~~gogogo~~ 第一種既動物係山羊~~之後不解釋~~
餵食完野生動物之後，落左車竟然見到有「袋鼠」呀~~~~
咁我地又餵袋鼠囉，100yen一杯蘋果條，好過癮架，仲可以隨便觸摸佢地，不過小心佢地既屎屎粒會涉入鞋底喎。
離開動物園，我地都係諗住去遊晒八個地獄，第一個就見依個天然坊主地獄。咁阿嘟就入去問阿姐係唔係有地獄套票賣，之後阿姐就話：「Da咩Da咩」，咁我味買單棍入去囉。入到去發現點解依個坊主地獄同書裡面相係唔同既? 原來依個係私人興建既一個富有日本風情既泉眼公園，既然入左去， 就好好享受啦! 行錯路，去錯地方都係一浪漫。400yen一人。
之後我地上車，渣左五分鐘左右，搵到果八個既地獄入口，買左套票，可以入晒八個地獄，套票價1890yen一人。第一個梗係最多人去既海地獄啦。
差唔多每一個地獄都有「足湯」，所以有時間既話，可以感受一下各個唔同足湯既分別。海地獄依個係我地覺得最舒服既，溫度啱啱好呀~~
唔知係唔係肚餓既關係呢，依個溫泉蒸氣蘇出來的蛋，唔係講笑，好有蛋味同埋有小小既硫磺味道，配埋佢比既鹽，真係超一流呀。300yen五隻。
依個叫「極樂饅頭」640yen，都係用溫泉蒸氣蒸既，阿嘟叫依d饅做「鬼仔饅頭」話好似d鬼仔係地獄爬上黎咁喎，係紅豆包味。 ~^o^~
依個係我地心目中既「坊主地獄」。
竟然有得餵河馬，原來河馬係食紅蘿白，當我掉件蘿白入佢個口裡面，就好似見到外星生物喺道郁郁下咁。之後仲要噴到阿雞一面都係水，佢都幾古惑個喎，阿雞無嬲，佢係河生對我地旅程既一個祝福，好彩D聖水唔係臭既(汗 -_-")。
阿雞餵水豚
依個係惡鬼地獄既足湯，挑戰人類極限，隻腳浸完好似熟左咁，所以個個都秤起隻腳，掂小小就算。
正當我地想睇依個鬼山地獄既時候，喺鱷魚籠旁邊，見到成個場都好多「飛飛下」喺道飛來飛去，好細細隻果D呢。我地走都走唔切呀~~
血池地獄既足湯唔熱，我地四個人都浸左好耐，仲可以喺個足湯走來走去添。
龍卷地獄係一個間歇泉，每當定時定刻就會噴發好熱既泉水出黎，所以叫間歇泉，咁啱我地去到既時候差唔多噴發，所以睇埋就走喇。不過如果要等好耐既話，我諗.....我地未必會等。
遊完八個地獄之後，我地開車去到海邊玩砂湯，去到會比一件浴衣你著，唔可以著底衫褲，之後就等佢挖個窿活埋你，D沙好重好重，將整個人蓋住，就好似回歸嬰兒被包住既感覺，好溫暖，真係好舒服。不經不覺就訓左，1350yen一人。資料：TEL:097-766-5737
酒店：秀峰館
價錢：HK$1100一人
包括：住宿、晚餐、早餐
網址：http://www.shuhokan.jp/
去到大約6點左右CHECK IN，入到房換衫先，我地7點30分食飯，先去浸個正溫泉先。
開始食飯喇，依個係我地既MENU，好多野食咁喎，每樣都好「的色」，但係食得飽既。
今餐係出奇地無叫酒飲，因為阿V浸溫泉既時候，不斷係凍水同熱水既池徘徊(當時勁爽)，後來唔舒服，所以大家都唔飲酒一晚咁多啦。
極上「豊後牛」，肉質好林，入口即溶，但牛肉味不太重。
當你去食飯既時候，酒店既工作人員就會入黎幫你整理床鋪，唔洗費心。咁早，都係落去樓下商店買D酒飲下先訓~~
╭。☆║．．．．．．．．．．．．．．║☆。╮
＊－。－。－。－。－。－。－。－。－。－。－。－。－。－。－。－。－。－。－＊
╭。☆║．．．．．．．．．．．．．．║☆。╮
2015年北九州半自駕遊
╰。☆║．．．．．．．．．．．．．．║☆。╯
☆2015年11月29日 (DAY 1)☆
☆2015年11月30日(DAY 2)☆
☆2015年12月1日 (Day 3)☆
☆2015年12月2日 (Day 4)☆
☆2015年12月3日 (Day 5)☆
☆2015年12月4日 (Day 6)☆
☆2015年12月5日 (Day 7)☆
☆2015年12月6日(Day 8)☆
╭。☆．。☆．。☆．．．♬♬~(￣▽￣)~♬♬．．．☆。．☆。．☆。╮
╰。☆．。☆．。☆．．．．．．．．．．．．．．☆。．☆。．☆。╯
沒有留言:
張貼留言