日本北九州半自駕遊
阿蘇→熊本
2015年12月4日 (Day 6)阿蘇、米塚、草千里、白川水源、水前寺成趣園、熊本城、櫻之小路、馬肉刺身、熊本
一朝早起身，企喺個露台道，望住阿蘇既風景，真係覺得朝氣勃勃，阿嘟當然唔放過依個機會去浸返個「晨湯」，之後就食酒店既自助早餐，食早餐既餐廳好大好大，有好多遊客，食物都供應得好快，所以都唔錯架。
第一站，向阿蘇火山出發，由於我地出發前，阿蘇係爆過黎，所以阿蘇纜車就關閉左，火山既一公里範圍之內都係禁止進入既。
我地上山既時候，全程都係無車既，好似拍緊世界末日之後既電影一樣，周圍都好荒蕪，雞比就成日講：「哎呀，係唔係入左禁區呀」，佢真係名乎其實既「淆底雞」。
去「草千里」前係經過「米塚」。
到左「阿蘇火山博物館」，有幾點雪花，我地黎到既時候係九點鐘，可能未有陽光既關係，地下都鋪上薄薄的一層雪，好凍呀。
我地入左「阿蘇火山博物館」，睇左一D有關阿蘇既資料，而又睇埋佢既小電影，不得不佩服日本人用感恩既心情去對待大自然對他們的恩賜，並沒有抱怨火山為他們帶來的困擾，反而利用之，一個字「勁」。
雖然我地今次睇唔到火山口，但下次我地一定會再黎。
依個就係「草千里」，真係好遼闊，如果係夏、秋天黎一定好靚呀。凍到D植物都結左冰呀。
離開「阿蘇火山」再出發，依D一級一級既樓梯，應該係人工造成既，可能為左防止火山爆發時既溶岩掛，我都唔知呀。
沿途落山既路，風景好好，好多田，好靚，好似越一個山之後既世外桃源咁。雞話依個景仲靚過「白川鄉」，我都覺得係。而條路係有停車位，可以泊低架車慢慢欣賞。
黎到「白川水源」，梗係黎飲下佢D水啦，「白川水源」係一個「湧泉」，水會喺地底湧上黎，入場費100円，你可以帶個水樽入去裝水飲，無樽就可以買個樽，D水係清甜既。
參觀完「白川水」之後，我地喺果道唯一一間餐廳食午餐，果間餐廳係賣醬酒既，有小小野食啦，例如拉麵、冷麵呀等等。阿雞佢一坐低就叫左個唔知乜湯，因為係日文黎既，佢話好凍所以見到係湯就點喇。點知個湯未到，果個好好客既老闆，不斷叫我地試佢既醬酒，用豆腐黎點。最少有八件試味既豆腐(每人)，大家都知日本人既試食係一D都唔吝嗇，所以件件都咁大件既，食豆腐都食飽。
最好笑係，阿雞果個唔知乜湯黎到，原來係「豆腐湯」，我笑到收唔到聲，我仲問阿雞「原來你咁鐘意食豆腐」 ~^O^~ 從此阿雞就有個朵叫「豆腐雞」。
食完野仲買左D醬酒同埋漬物做手信。總共5060円。
睇完成趣園，之後去必去景點熊本成，點都要到一到既。
喺熊本城既休息站，有抹茶體驗，當然唔係自己磨啦，仲有一粒「餅仔」，唔好睇少粒餅仔，係奶黃味，配抹茶黎飲，好夾好滋味架。(300円一份)
喺「熊本城」下面既「櫻之小路」，而裡面有個博物館「歷史文化體驗設施涌涌座」(電話：096-288-5600)，博物館加熊本城既入場券(1200円)，值唔值得去博物館就見仁見智喇。
可以著住主公既服裝，玩下COSPLAY，完全免費既。
依個係「天草幻之雞」，外脆內軟，不過小小油，雞味好濃，500円，5至6粒，食完暖粒粒，行過可以試下，即整架。
黎到熊本酒店，CHECK IN左，入住JR Kyushu Hotel Kumamoto (JR九州熊本酒店)，依晚既房價係7200円，喺JR站格離，有免費停車場，交通好方便。
我地去還車喇。
因為聖誕臨近既關係，市電都換上新裝，令人眼見一亮。
叫得農場，應該都係食下雞蛋呀，雞呀，馬呀咁啦，原來真係，好多用雞做既食物，好特別架。而服務員會過黎同你傾下計咁既，個服務員叫「みさしmisaki小姐」，但係服務員係唔陪你飲酒既，最後佢仲送左有我地個名的甜品比我地添。除左以下既食物之外，我地每人飲左4杯啤酒，埋單係9061円。
依個係「馬刺」-馬肉刺身，肉無味，要夾蒽同蒜頭黎食，蒽同蒜蓋過左肉既味道，超級血淋淋，唔怕既朋友仔要試下喇。
依個雞奕係好好味，肉質鮮嫩，有咬口，有濃郁既雞味，好瘦既，唔油利。
個甜品係有我地個名架。
阿嘟一飲左酒就會話要去「濕平」，我發達喇HEHEHE，所以男士們唔想大出血，就唔好飲咁多喇。
![激安之殿堂]](https://blogger.googleusercontent.com/img/b/R29vZ2xl/AVvXsEjaEz4TKfmT2OHTdgse4mls7tvrQ95Kj4ShD1Zr4bz-Ksblji1LuVUD30H0wL1Gs1axveMfUhD2tm0flAmash26nV_XcmwxcCzHkcbvc2dBkISuCXDnb0THm0bvzC7CvfaNW6DtSL5Be6z4/s1600/20151204_210527.jpg)
雖然有D醉意，但係都係要預備下明天既行程，要睇下明天搭果架車既時間，之後就返酒店喪訓喇。晚安........
＊－。－。－。－。－。－。－。－。－。－。－。－。－。－。－。－。－。－。－＊
╭。☆║．．．．．．．．．．．．．．║☆。╮
2015年北九州半自駕遊
╰。☆║．．．．．．．．．．．．．．║☆。╯
☆2015年11月29日 (DAY 1)☆
☆2015年11月30日(DAY 2)☆
☆2015年12月1日 (Day 3)☆
☆2015年12月2日 (Day 4)☆
☆2015年12月3日 (Day 5)☆
☆2015年12月4日 (Day 6)☆
☆2015年12月5日 (Day 7)☆
☆2015年12月6日(Day 8)☆
╭。☆．。☆．。☆．．．♬♬~(￣▽￣)~♬♬．．．☆。．☆。．☆。╮
╰。☆．。☆．。☆．．．．．．．．．．．．．．☆。．☆。．☆。╯
沒有留言:
張貼留言