迷路驚喜系列
四國高知縣
蘋果芒
我地本來係去附近既「伊尾木洞」, 但係入錯左MAP CODE, 所以帶左我地去左唔知邊道, 一行四人都未食野, 所以真係好肚餓呀, 方圓百里都無餐廳, 又餓又搵唔到既時候, 就見到依間有CAFE的植物專賣店, 入去抖一抖啦。
以為CAFE裡面, 可能有D意粉食, 點知得甜品, 呀~~~~~~~一向唔係咁好甜既雞比, 即刻變左個失落既問話符號, 但都要食架, 唔可以餓壞既。
依間植物專賣店, 係應該唔會有遊客到, 只有當地人去選購, 所以店員係一粒英文都唔識, 而我地就只係用十分有限既日文同佢地溝通, 而店員就好極力推介「蘋果芒」, 不過當做季節係6月至9月, 但當時係5月喎, 都有得食, 不過無得賣, 可以訂, 咁我地試下點左以下幾樣野啦。
先介紹最最最普通既朱古力窩夫Waffle, 雞比話最保險, 所以叫朱古力, 窩夫係即整既, 所以熱辣辣, 皮好脆, 朱古力醬好濃, 而果醬係農場自製的, 所以好新鮮, 甜而不膩, 窩夫加上雪糕一齊食, 一啖裡面有熱又有凍, 口感實在太衝擊喇, 加上新鮮小花做裝飾, 簡直未食已經好開心, 搵路搵到死死地既阿雞話食完要起身跳舞喎。
第二款, 叫左二份, 見到係三文治就叫喇, 因為肚餓丫麻, 有包落肚, 黎到原來係甜既三文治, 同樣有鮮花伴碟, 花開得好靚, 未食已經覺得疲勞全消, 一口入, 新鮮既忌廉帶有牛奶既香味, 十分之幼滑, 裡面的「蘋果芒」十分之清甜, 沒有芒果本身的俗氣, 同忌廉既味道極之配合, 麵包很鬆軟, 忍唔住大啖大啖食完佢。
登登登登, 蘋果芒雪葩, 依款只有小小既綠葉去裝飾, 外表十分簡單, 但味道絕對不簡單, 白色的是香滑牛奶味重的忌廉加上芒果汁, 右手邊的是蘋果芒雪糕, 應該係無用牛奶, 似意大利雪糕的做法, 口感冰冰的又很軟棉棉, 有D思樂冰FEEL, 食一小啖之後感覺立即變返小朋友, 好想一大啖吞左佢,
而下面既先係重點, 是半個雪成冰的「蘋果芒」, 沒有任何製作過, 食最原始的味道, 嘩~~~~係超~~級~~香甜, 從未食過這樣香甜而帶有花香的味道, 食第一啖感動到想流淚的味道, 實在太好味、太幸福喇~~~
而因為將「蘋果芒」雪成冰的關係, 你的味覺會被低溫麻醉, 一邊食蘋果芒冰一邊融化, 溫度慢慢提升, 香甜味會越來越濃郁, 不會有好悶而不想繼續食落去既感覺, 諗起都想哭了, 食過真係返唔到轉頭既.......
MERRY GARDEN係有溫室種植「蘋果芒」的, 可以預訂架, 但他們沒有網頁, 只有電話及傳真, 如果有興趣只能搵精通日本既朋友仔幫手喇。
以下係依個「MERRY GARDEN」的營業時間, 如果大家想去試一試的話, 就要留意下喇。
除左水果, 他們是賣植物的, 可以買D種子回國做手信。
名稱：メリーガーデン (Merry Garden)
電話：0887-32-0650
地址：高知県安芸市川北甲6951
營業時間：09:00-17:00
休息：星期二
網址：http://www.merrygarden.jp/
╭。☆║．．．．．♬♬~(￣▽￣)~♬♬．．．．．║☆。╮
☆★其他精彩旅程★☆
╰。☆║．．．．．．．．．．．．．．．．．．║☆。╯
沒有留言:
張貼留言