日本北九州半自駕遊
2015年12月1日 (Day 3)福岡→大分縣
小倉、旦過市場、門司港、別府
又出發喇，今日我地由酒店出發，由中洲搭的士(920yen)去博多駅攞車。我地今次租4日3夜，在博多取車到熊本還車，價錢係HK$1820，費用包括：保險、Kyushu Expressway Pass、異地還車費、ETC。
Kyushu Expressway Pass資料：http://www.fukuoka.com.hk/archives/6478/
攞左車之後，我地向住小倉出發，途中有服務站(古賀)，啱晒呀，因為我地未食飽早餐，只係喺七仔買左D飯團食，唔夠飽。
黎到小倉，都算幾難搵位泊既，結果我地泊喺火車站隔離果間酒店，泊左2小時，800yen。
之後我地就步行過去「旦過市場」，十五分鐘左右啦。
旦過市場我自己覺得好地道，好多日本的媽媽嫲嫲都黎依道買餸，蔬菜呀、肉呀、水果呀等等價錢合理，好少見到遊客。
我地揀左依間餐廳食Lunch，雖然早餐未落格，但依然食得落，因為材料新鮮，依個係我食過既天婦羅之中既皇者，好好好好味，外脆內軟又juice，食左4390yen(4人價錢)。
食飽之後就去買士多啤利700yen、蕃茄216yen，仲見到北海道海膽2000yen，係唔放過佢啦。
之後上車去「九州鐵道紀念館」，有聽人講，其實入面無乜野睇，所以我地到一到，映下相就算喇。
去「門司港」，對面就係「關門海峽-下關地區」。我地無過對面，門司港泊車都係幾難搵位既，我地比左200yen泊車。行左一陣買左小小野，就離開依個地方喇。
今日天氣十分之好呀，沿途好多靚既風景。
依架係我地租用既車，4個人啱啱好。放到一個大喼同二個細喼。
我地仲唔小心行錯路，入左情侶hotel添
今晚我地住喺「別府」-Nishitetsu Resort Inn Beppu（西鐵貝普度假酒店），有溫泉浸，一房價錢HK$502，床勁大張，仲要包自助式早餐，多款式食物，一個字「抵到爛」。
安頓好左之後，梗係放輕鬆搵野食，阿V同R話想食燒肉，當然要滿各位團友既要求啦，我地行左一陣，到依間個室燒肉，話明係「個室」，就係只係我地四個人一間房間，好有自己既空間，阿嘟話正，仲喪飲啤酒，每杯係1公升架，每人飲左3大杯，笑笑說說飲飲食食咁就一個晚上啦(埋單13,813yen)，行返既途中要去便利店買定D宵夜，浸完溫泉食宵夜，繼續飲飲食食~~~
去浸溫泉喇!
今日完喇~~
＊－。－。－。－。－。－。－。－。－。－。－。－。－。－。－。－。－。－。－＊
╭。☆║．．．．．．．．．．．．．．║☆。╮
2015年北九州半自駕遊
╰。☆║．．．．．．．．．．．．．．║☆。╯
☆2015年11月29日 (DAY 1)☆
☆2015年11月30日(DAY 2)☆
☆2015年12月1日 (Day 3)☆
☆2015年12月2日 (Day 4)☆
☆2015年12月3日 (Day 5)☆
☆2015年12月4日 (Day 6)☆
☆2015年12月5日 (Day 7)☆
☆2015年12月6日(Day 8)☆
╭。☆．。☆．。☆．．．♬♬~(￣▽￣)~♬♬．．．☆。．☆。．☆。╮
╰。☆．。☆．。☆．．．．．．．．．．．．．．☆。．☆。．☆。╯
沒有留言:
張貼留言